20 красавіка 2021 года ў фармаце відэаканферэнцыі прайшло 4-е пасяджэнне беларуска-польскіх рабочых груп у сферы метэаралогіі, гідралогіі і авіяцыйнай метэаралогіі . У пачатку пасяджэння абмяняліся прывітальнымі словамі намеснік дырэктара Інстытута метэаралогіі і воднай гаспадаркі – Дзяржаўнага навукова-даследчага інстытута Рэспублікі Польшча ( ІМВГ-ДНДІ ) Павел Дэрэк і першы намеснік начальніка рэспубліканскага Гідраметэацэнтра Святлана Кузьміч. У рамках пасяджэння было разгледжана выкананне рашэнняў, прынятых на 3-ім пасяджэнні рабочых груп у Мінску 19 лютага 2020 года. Сярод пытанняў у сферы метэаралогіі, абмеркаваных на пасяджэнні, варта адзначыць правядзенне практычных трэнінгаў для сіноптыкаў Белгідрамета на базе ІМВГ-ДНДІ, абмен 10-хвіліннымі метэаралагічнымі звесткамі, укараненне тэхналогіі апрацоўкі звестак лікавай мадэлі ICON у ІМВГ-ДНДІ і абмен радыёлакацыйнымі звесткамі паміж дзвюма арганізацыямі. Па іншаму кірунку працы рабочых груп – гідралогіі – была абмеркавана пытанне па правядзенні заключнага этапу сумесных міжнародных гідраметрычных і далінных геадэзічных здымкаў папярочных перасекаў у профілях гідралагічных пастоў, размешчаных на рацэ Буг. Акрамя таго, упаўнаважаны дырэктара па піяры ІМВГ-ДНДІ Мацей Язвецкі асвятліў пытанне, у якім быў зацікаўлены беларускі бок - праца па паляпшэнні іміджу і грамадскае прызнанне польскай гідраметэаралагічнай службы. Не гледзячы на нестандартны варыянт правядзення пасяджэння, яно апынулася эфектыўным. Па завяршэнні мерапрыемства ўдзельнікамі была выказана надзея на правядзенне наступнага пасяджэння рабочых груп на тэрыторыі Рэспублікі Польшча ў вочным фармаце.

20 красавіка 2021 года ў прэс-цэнтры БелТА адбылася прэс-канферэнцыя аб правядзенні першай міжнароднай спецыялізаванай экалагічнай выставы-форуму Ecology Expo і Рэспубліканскага экалагічнага форуму «Уцягванне грамадзянскай супольнасці ў прыняцце экалагічных рашэнняў» . У прэс-канферэнцыі прынялі ўдзел прадстаўнікі Міністэрства прыродных рэсурсаў і аховы навакольнага асяроддзя Беларусі і выставачнага цэнтра «Белэкспа»: Алена Меляшкова  - намеснік начальніка ўпраўлення аналітычнай работы, навукі і інфармацыі Міністэрства прыродных рэсурсаў і аховы навакольнага асяроддзя Рэспублікі Беларусь; Вікторыя Воранава  - начальнік аддзела выкарыстання і аховы водных рэсурсаў Міністэрства прыродных рэсурсаў і аховы навакольнага асяроддзя Рэспублікі Беларусь; Вольга Сазонава  - начальнік галоўнага ўпраўлення рэгулявання абыходжання з адходамі, біялагічнай і ландшафтнай разнастайнасці Міністэрства прыродных рэсурсаў і аховы навакольнага асяроддзя Рэспублікі Беларусь; Вікторыя Агафонава  - начальнік упраўлення выстаў і кірмашоў выставачнага цэнтра «Белэкспа». Міжнародная спецыялізаваная экалагічная выстава-форум Ecology Expo-2021 і XVI Рэспубліканскі экалагічны форум «Уцягванне грамадзянскай супольнасці ў прыняцце экалагічных рашэнняў» пройдуць з 3 па 5 чэрвеня ў Мінску.   Мерапрыемствы прымеркаваны да Года народнага адзінства. Арганізатарамі з'яўляюцца Міністэрства прыродных рэсурсаў і аховы навакольнага асяроддзя, Нацыянальны выставачны цэнтр «Белэкспа», Мінскі гарадскі выканаўчы камітэт. « Ecology Expo  - гэта практычны інструмент прэзентацыі беларускіх і замежных інавацыйных вытворча-тэхналагічных дасягненняў у галіне аховы навакольнага асяроддзя, устойлівага выкарыстання прыродных рэсурсаў. Ключавымі на выставе стануць прэзентацыі зялёных тэхналогій у галіне аднаўляльнай энергетыкі і альтэрнатыўных крыніц энергіі, энергаэфектыўнага будаўніцтва, экалагічнага транспарту, эфектыўнага выкарыстання адходаў, біяупакоўкі, арганічнай і экалагічна чыстай прадукцыі, экатурызму, лепшых практык зялёных школ», - сказала Алена Меляшкова. Паводле яе слоў, Рэспубліканскі экалагічны форум - гэта пляцоўка для аб'яднання ўсіх слаёў грамадства ў вырашэнні праблем аховы навакольнага асяроддзя, максімальнага ўключэння насельніцтва рэспублікі ў экалагічны рух, павышэнне экалагічнай культуры, прасоўванне прынцыпаў устойлівага развіцця і фарміравання экалагічна дружалюбнага ладу жыцця. Старт экалагічнаму форуму быў дадзены ў 2003 годзе ў Оршы. Да 2014 года ён праводзіўся штогод, затым - адзін раз у два гады. Форум быў арганізаваны ў многіх рэгіёнах краіны - у Горках, Бабруйску, Віцебску, Полацку, Браславе, Мядзелі, Маладзечне, Рэчыцы, Мазыры, Горадні, Наваградку, Брэсце і Мінску. Сёлета сталіца ўжо другі раз прыме яго. «Асноўная тэма экалагічнага форуму - уцягванне грамадзянскай супольнасці ў прыняцце экалагічных рашэнняў. У сувязі з гэтым у краіне праходзяць розныя акцыі, мерапрыемствы, конкурсы, высаджваюцца паркі, арганізоўваецца валанцёрскі рух па азеляненні, уборцы смецця. Падчас дзелавой праграмы форуму плануецца абмеркаванне пытанняў удасканалення экалагічнай палітыкі, развіцця зялёнай эканомікі, устойлівасці экасістэм, ролі грамадскасці ў вырашэнні экалагічных праблем», - распавяла намеснік начальніка ўпраўлення. Яна адзначыла, што перспектывы ўстойлівага развіцця Беларусі, як і многіх іншых краін, цесна звязаны з абавязацельствамі ў рамках 23 міжнародных канвенцый і дагавораў у галіне аховы навакольнага асяроддзя. «У гэтай сувязі правядзенне дадзеных мерапрыемстваў выклікала вялікую цікавасць у нашых замежных партнёраў. Таксама плануецца ўдзел рэспубліканскіх органаў дзяржкіравання, дыпламатычнага корпуса, навуковай супольнасці, грамадскіх аб'яднанняў», - патлумачыла Алена Меляшкова. На яе думку, правядзенне выставы і форуму стане ўнікальнай пляцоўкай для вызначэння далейшага зялёнага развіцця краіны праз сістэму «дзяржава - бізнес - грамадства». «У прыватнасці, гэта адлюстравана і ў канцэпцыі лагатыпаў мерапрыемстваў. Напрыклад, форма лагатыпа выставы нагадвае планету Зямля. Дзве літары "е", звернутыя адзін да адной, сімвалізуюць экалогію і эканоміку», - дадала прадстаўнік міністэрства. Мерапрыемствы праводзяцца пры падтрымцы Савета Міністраў, рэспубліканскіх органаў дзяржаўнага кіравання, праекта «Уцягванне грамадскасці ў экалагічны маніторынг і паляпшэнне кіравання аховай навакольнага асяроддзя на мясцовым узроўні», які фінансуецца Еўрапейскім Саюзам і рэалізуецца Праграмай развіцця ААН у партнёрстве з Мінпрыроды, а таксама іншых зацікаўленых арганізацый. Інфармацыя і фота ўзяты з сайта БелТА  

14 красавіка 2021 года ў Нацыянальным Прэс-цэнтры Рэспублікі Беларусь адбылася прэс-канферэнцыя на тэму «Асаблівасці экалагічнага маніторынгу і кантролю ва ўмовах мегаполіса на прыкладзе горада Мінска» . У прэс-канферэнцыі прыняла ўдзел начальнік службы экалагічнай інфармацыі Белгідрамета Багадзяж Алена Пятроўна. Аказваецца, што размеркаванне аб'ёмаў выкідаў забруджвальных рэчываў ад стацыянарных крыніц па тэрыторыі горада нераўнамерна. Найбольшая эмісія характэрна для Завадскога, Фрунзенскага і Партызанскага раёнаў сталіцы. Калі разглядаць аўтатранспарт, то найбольшую нагрузку адчувае цэнтральная частка горада і транспартныя магістралі. Пра гэта паведамілі на прэс-канферэнцыі ў Белпрэсцэнтры. Асноўны ўклад у забруджванне атмасфернага паветра ўносяць мабільныя крыніцы, на долю якіх прыпадае больш за 80% (113,8 тыс.тон) ад агульнай эмісіі выкідаў у атмасфернае паветра. У 2019 годзе гэты паказчык адпавядаў 130,1 тыс.тон. Скарачэнне склала 12,5%. Несумненна, буйныя прамысловыя прадпрыемствы аказваюць негатыўнае ўздзеянне на навакольнае асяроддзе. Разам з тым, у выніку мэтанакіраванай працы і кантролю з боку дзяржслужб у апошнія гады не назіраецца значнага росту выкідаў у атмасфернае паветра ад прамысловых прадпрыемстваў. Індэкс якасці паветра ў Мінску па спецыялізаванай шкале адпавядае адзінцы (1), часам 2. Для кожнага забруджвальнага рэчыва значэнне індэкса вар'іруецца ад 1 (добра) да 5 (вельмі дрэнна). Для параўнання ў Маскве гэты індэкс - 4, у Берліне, Варшаве, Рыме і Вільні – 2, а ў Мілане – 3.   Інфармацыя ўзята на сайце Белпрэсцэнтра .

З 12 па 16 красавіка ў Белгідрамеце праходзіць прафарыентацыйны праект «Крок у будучыню», арганізаваны сумесна з ДУ «Мінскі гарадскі цэнтр сацыяльнага абслугоўвання сям'і і дзяцей». Дадзены праект у першую чаргу накіраваны на дапамогу падлеткам з выбарам будучай спецыяльнасці. Пра сваю прафесію навучэнцам распавядаюць спецыялісты аддзела па сувязях з грамадскасцю, службы метэаралагічных прагнозаў, службы гідралогіі і аграметэаралогіі, службы сродкаў вымярэнняў, а таксама аддзела метэаралагічных і аэралагічных назіранняў Філіяла «Мінскаблгідрамет».   У праекце ўдзельнічаюць установы адукацыі горада Мінска: ДУА «Гімназія №5 г.Мінска імя Герояў сустрэчы на Эльбе», ДУА «Гімназія №7 г. Мінска», ДУА «Сярэдняя школа №10 г. Мінска», ДУА «Сярэдняя школа №22 г. Мінска імя С.І.Грыцаўца», ДУА «Сярэдняя школа №69 г. Мінска», ДУА «Сярэдняя школа №72 г.Мінска», ДУА «Сярэдняя школа №86 г.Мінска», ДУА «Сярэдняя школа №87 г.Мінска», ДУА «Сярэдняя школа №108 г.Мінска», ДУА «Сярэдняя школа №133 г.Мінска», ДУА «Сярэдняя школа №182 г.Мінска імя Уладзіміра Карвата», ДУА «Сярэдняя школа №183 г.Мінска», ДУА «Сярэдняя школа №223 г.Мінска імя Іёна Солтыса».

Для павышэння ўзроўню бяспекі насельніцтва, актывізацыі пажарна-прафілактычнай работы, аналізу яе эфектыўнасці і ацэнкі гатоўнасці тэрыторый да вяснова-летняга пажаранебяспечнага сезона ў перыяд з 12 па 28 красавіка 2021 года Міністэрства па надзвычайных сітуацыях Рэспублікі Беларусь праводзіць Рэспубліканскую пажарна-прафілактычную акцыю па папярэджанню пажараў і гібелі людзей ад іх у жыллёвым фондзе «за бяспеку разам». Мэта акцыі: Зніжэнне колькасці пажараў, якія адбываюцца па прычыне невыканання грамадзянамі правілаў пажарнай бяспекі ў жылых будынках і збудаваннях, населеных пунктах і тэрыторыях, павышэнне інфармаванасці насельніцтва аб магчымасцях дзяржаўных арганізацый па аказанню паслуг у сферы забеспячэння пажарнай бяспекі, умацаванне правапарадку, папярэджанне правапарушэнняў, якія здзяйсняюцца грамадзянамі ў стане алкагольнага ап'янення. Задачы акцыі: 1. Інфармаваць насельніцтва аб стане пажарнай бяспекі, растлумачыць грамадзянам наступствы невыканання правілаў пажарнай бяспекі, пакідання дзяцей без нагляду, злоўжывання спіртнымі напоямі. 2. Аказаць дапамогу рэспубліканскім органам дзяржаўнага кіравання, мясцовым выканаўчым і распарадчым органам, іншым арганізацыям, у навучанні грамадзян мерам пажарнай бяспекі ў побыце і на вытворчасці, аказаць дапамогу пазаштатным пажарным фарміраванням у арганізацыі пажарна-прафілактычнай работы. 3. Акцэнтаваць увагу мясцовых выканаўчых і распарадчых органаў на неабходнасць правядзення рэгулярнай і мэтанакіраванай работы па забеспячэнню пажарнай бяспекі на адпаведнай тэрыторыі, павышэння ўзроўню супрацьпажарнай абароны домаўладанняў кватэр адзінокіх пажылых грамадзян і інвалідаў. Падчас акцыі, работнікамі РАНС будуць праведзены рэйды па праверцы жылых дамоў, скляпоў, прыняты меры па ліквідацыі выяўленых парушэнняў. Асаблівая ўвага будзе нададзена растлумачальнай працы. Прадстаўнікі МНС наведаюць дома адзінока пражываючых пажылых грамадзян і сем'і, у якіх дзеці знаходзяцца ў сацыяльна небяспечным становішчы, раскажуць аб недапушчальнасці пакідання дзяцей без нагляду і крымінальнай адказнасці бацькоў, а таксама аб асноўных прычынах узнікнення пажараў у жыллё.   

9 красавіка 2021 года ў Рэспубліканскім цэнтры кіравання і рэагавання на надзвычайныя сітуацыі МНС пад кіраўніцтвам намесніка Прэм'ер-міністра Рэспублікі Беларусь Анатоля Сівака адбылося пасяджэнне камісіі па надзвычайных сітуацыях пры Савеце Міністраў. У пасяджэнні прынялі ўдзел Міністр па надзвычайных сітуацыях Вадзім Сіняўскі, начальнік Белгідрамета Аляксандр Канавальчык, кіраўнікі дзяржаўных органаў кіравання, абласных і Мінскага гарадскога выканкамаў. Галоўнай тэмай працы Камісіі па надзвычайных сітуацыях стала падрыхтоўка сіл і сродкаў ДСНС да пажаранебяспечнага перыяду ў 2021 годзе. Анатоль Сівак акцэнтаваў увагу на тым, што першараднай задачай на сённяшні дзень з'яўляецца арганізацыя аператыўнага рэагавання на ўзнікненне пажараў у экасістэмах. Першы намеснік Міністра па надзвычайных сітуацыях Аляксандр Худалееў адзначыў, што ў апошнія тры гады назіраецца рост колькасці пажараў у экасістэмах. 87% ад агульнай колькасці – гэта загаранне травы і кустоў. У бягучым годзе пажаранебяспечны сезон пачаўся ў першай дэкадзе сакавіка. Найбольшая колькасць пажараў у экасістэмах ліквідавана падраздзяленнямі МНС на тэрыторыі Брэсцкай і Мінскай абласцей. Ён заклікаў кіраўнікоў усіх узроўняў прыняць вычарпальныя меры да кіраўнікоў аб'ектаў, якія дапускаюць несанкцыянаваныя звалкі і выпальванне леташняй расліннасці на корані. Фота ўзята з сайта МНС Акрамя таго, Камісія разгледзела рэалізацыю Нацыянальнай стратэгіі па зніжэнню рызыкі ўзнікнення надзвычайных сітуацый у Рэспубліцы Беларусь на 2019-2030 гады. Анатоль Сівак пазначыў, што стратэгія - новы і доўгатэрміновы дакумент, накіраваны на павышэнне ўзроўню бяспекі жыццядзейнасці грамадзян з акцэнтам на папярэджанне НС. Інфармацыя падрыхтавана па матэрыялах сайта МНС Беларусі  

9 красавіка 2021 года працоўны дэсант Белгідрамета на чале са старшынёй першаснай прафсаюзнай арганізацыі Наталляй Аляхновіч прынялі актыўны ўдзел у маштабнай акцыі, якая праводзіцца ў рамках экалагічнага руху «Разам за чыстую і зялёную краіну». Сумесна з прафсаюзным актывам г.Мінска і Першамайскага раёна быў праведзены першы этап акцыі па добраўпарадкаванні тэрыторыі, прызначанай пад маштабную высадку кустоў. Усяго запланавана высадзіць 10 тысяч кустоў жоўтага і чырвонага пузыраплодніка і ружы маршчыністай. Праца была не з лёгкіх - удзельнікі акцыі здымалі дзёран і добраўпарадкоўвалі абраны ўчастак на тэрыторыі, прылеглай да знешняй кальцавой дарогі насупраць Парку высокіх тэхналогій (вул. Купрэвіча,1) з падтрымкай вопытных настаўнікаў з КУП «Зелянбуд Першамайскага раёна г.Мінска» атрымалася хутка і якасна справіцца з пастаўленай задачай. Другі этап акцыі па добраўпарадкаванні, а менавіта высадка кустоў, адбудзецца ў канцы красавіка. Белгідрамет заўсёды падтрымлівае і ўдзельнічае ў акцыях экалагічнай накіраванасці, каб родны горад і любімы Першамайскі раён станавіліся ўсё больш прыгожымі, чыстымі і зелянейшымі.

На прытоку Сожа рацэ Проня ў в.Ляцягі ўзровень вады перавысіў небяспечную высокую адзнаку, у раёне гідралагічнага пункта назіранняў затапленняў не назіраецца.    

На рацэ Нёман у г.Гродна ўзровень вады дасягнуў адзнакі, пры якой узнікаюць цяжкасці ў працы рачнога транспарту.

Штогод 2 красавіка адзначаецца Дзень яднання народаў Беларусі і Расіі. Гэта знамянальнае свята ўвасабляе імкненне брацкіх народаў да інтэграцыі, захаванню і ўмацаванню духоўнага адзінства. Менавіта ў гэты дзень у 1996 годзе прэзідэнты Расіі і Беларусі падпісалі ў Маскве Дагавор «Аб стварэнні Супольнасці Расіі і Беларусі». За 25 гадоў існавання саюзны праект па-ранейшаму застаецца актуальным для абедзвюх краін: заключаны дзясяткі пагадненняў, перамовы праходзяць рэгулярна на самым высокім узроўні. Грамадзяне Беларусі і Расіі маюць роўныя правы. Краіны разам праводзяць абаронную палітыку, узгадняюць узаемадзеянне на знешнепалітычнай арэне, рэалізуюць буйныя эканамічныя, навуковыя і гуманітарныя праекты. Нягледзячы на складаную эпідэміялагічную сітуацыю ў свеце, 2 красавіка 2021 года ў Мінску і Маскве ў камбінаваным анлайн і афлайн фарматах прайшоў урачысты сход "Саюзная дзяржава: адкрываючы новыя магчымасці". У ходзе сходу былі праведзены тэматычныя экспертныя абмеркаванні актуальных пытанняў інтэграцыі Беларусі і Расіі па наступных напрамках: «Адзіная прававая прастора, абарона і бяспека-фундамент Саюзнай дзяржавы», «Эканамічны патэнцыял Саюзнай дзяржавы: стан і шляхі развіцця», «Сацыяльныя праекты і моладзь як рэсурс інавацыйнага развіцця Саюзнай дзяржавы». У рабоце дадзенага мерапрыемства прыняў удзел начальнік дзяржаўнай установы «Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя» Аляксандр Валер'евіч Канавальчык.