14 красавіка 2021 года ў Нацыянальным Прэс-цэнтры Рэспублікі Беларусь адбылася прэс-канферэнцыя на тэму «Асаблівасці экалагічнага маніторынгу і кантролю ва ўмовах мегаполіса на прыкладзе горада Мінска» . У прэс-канферэнцыі прыняла ўдзел начальнік службы экалагічнай інфармацыі Белгідрамета Багадзяж Алена Пятроўна. Аказваецца, што размеркаванне аб'ёмаў выкідаў забруджвальных рэчываў ад стацыянарных крыніц па тэрыторыі горада нераўнамерна. Найбольшая эмісія характэрна для Завадскога, Фрунзенскага і Партызанскага раёнаў сталіцы. Калі разглядаць аўтатранспарт, то найбольшую нагрузку адчувае цэнтральная частка горада і транспартныя магістралі. Пра гэта паведамілі на прэс-канферэнцыі ў Белпрэсцэнтры. Асноўны ўклад у забруджванне атмасфернага паветра ўносяць мабільныя крыніцы, на долю якіх прыпадае больш за 80% (113,8 тыс.тон) ад агульнай эмісіі выкідаў у атмасфернае паветра. У 2019 годзе гэты паказчык адпавядаў 130,1 тыс.тон. Скарачэнне склала 12,5%. Несумненна, буйныя прамысловыя прадпрыемствы аказваюць негатыўнае ўздзеянне на навакольнае асяроддзе. Разам з тым, у выніку мэтанакіраванай працы і кантролю з боку дзяржслужб у апошнія гады не назіраецца значнага росту выкідаў у атмасфернае паветра ад прамысловых прадпрыемстваў. Індэкс якасці паветра ў Мінску па спецыялізаванай шкале адпавядае адзінцы (1), часам 2. Для кожнага забруджвальнага рэчыва значэнне індэкса вар'іруецца ад 1 (добра) да 5 (вельмі дрэнна). Для параўнання ў Маскве гэты індэкс - 4, у Берліне, Варшаве, Рыме і Вільні – 2, а ў Мілане – 3.   Інфармацыя ўзята на сайце Белпрэсцэнтра .

З 12 па 16 красавіка ў Белгідрамеце праходзіць прафарыентацыйны праект «Крок у будучыню», арганізаваны сумесна з ДУ «Мінскі гарадскі цэнтр сацыяльнага абслугоўвання сям'і і дзяцей». Дадзены праект у першую чаргу накіраваны на дапамогу падлеткам з выбарам будучай спецыяльнасці. Пра сваю прафесію навучэнцам распавядаюць спецыялісты аддзела па сувязях з грамадскасцю, службы метэаралагічных прагнозаў, службы гідралогіі і аграметэаралогіі, службы сродкаў вымярэнняў, а таксама аддзела метэаралагічных і аэралагічных назіранняў Філіяла «Мінскаблгідрамет».   У праекце ўдзельнічаюць установы адукацыі горада Мінска: ДУА «Гімназія №5 г.Мінска імя Герояў сустрэчы на Эльбе», ДУА «Гімназія №7 г. Мінска», ДУА «Сярэдняя школа №10 г. Мінска», ДУА «Сярэдняя школа №22 г. Мінска імя С.І.Грыцаўца», ДУА «Сярэдняя школа №69 г. Мінска», ДУА «Сярэдняя школа №72 г.Мінска», ДУА «Сярэдняя школа №86 г.Мінска», ДУА «Сярэдняя школа №87 г.Мінска», ДУА «Сярэдняя школа №108 г.Мінска», ДУА «Сярэдняя школа №133 г.Мінска», ДУА «Сярэдняя школа №182 г.Мінска імя Уладзіміра Карвата», ДУА «Сярэдняя школа №183 г.Мінска», ДУА «Сярэдняя школа №223 г.Мінска імя Іёна Солтыса».

Для павышэння ўзроўню бяспекі насельніцтва, актывізацыі пажарна-прафілактычнай работы, аналізу яе эфектыўнасці і ацэнкі гатоўнасці тэрыторый да вяснова-летняга пажаранебяспечнага сезона ў перыяд з 12 па 28 красавіка 2021 года Міністэрства па надзвычайных сітуацыях Рэспублікі Беларусь праводзіць Рэспубліканскую пажарна-прафілактычную акцыю па папярэджанню пажараў і гібелі людзей ад іх у жыллёвым фондзе «за бяспеку разам». Мэта акцыі: Зніжэнне колькасці пажараў, якія адбываюцца па прычыне невыканання грамадзянамі правілаў пажарнай бяспекі ў жылых будынках і збудаваннях, населеных пунктах і тэрыторыях, павышэнне інфармаванасці насельніцтва аб магчымасцях дзяржаўных арганізацый па аказанню паслуг у сферы забеспячэння пажарнай бяспекі, умацаванне правапарадку, папярэджанне правапарушэнняў, якія здзяйсняюцца грамадзянамі ў стане алкагольнага ап'янення. Задачы акцыі: 1. Інфармаваць насельніцтва аб стане пажарнай бяспекі, растлумачыць грамадзянам наступствы невыканання правілаў пажарнай бяспекі, пакідання дзяцей без нагляду, злоўжывання спіртнымі напоямі. 2. Аказаць дапамогу рэспубліканскім органам дзяржаўнага кіравання, мясцовым выканаўчым і распарадчым органам, іншым арганізацыям, у навучанні грамадзян мерам пажарнай бяспекі ў побыце і на вытворчасці, аказаць дапамогу пазаштатным пажарным фарміраванням у арганізацыі пажарна-прафілактычнай работы. 3. Акцэнтаваць увагу мясцовых выканаўчых і распарадчых органаў на неабходнасць правядзення рэгулярнай і мэтанакіраванай работы па забеспячэнню пажарнай бяспекі на адпаведнай тэрыторыі, павышэння ўзроўню супрацьпажарнай абароны домаўладанняў кватэр адзінокіх пажылых грамадзян і інвалідаў. Падчас акцыі, работнікамі РАНС будуць праведзены рэйды па праверцы жылых дамоў, скляпоў, прыняты меры па ліквідацыі выяўленых парушэнняў. Асаблівая ўвага будзе нададзена растлумачальнай працы. Прадстаўнікі МНС наведаюць дома адзінока пражываючых пажылых грамадзян і сем'і, у якіх дзеці знаходзяцца ў сацыяльна небяспечным становішчы, раскажуць аб недапушчальнасці пакідання дзяцей без нагляду і крымінальнай адказнасці бацькоў, а таксама аб асноўных прычынах узнікнення пажараў у жыллё.   

9 красавіка 2021 года ў Рэспубліканскім цэнтры кіравання і рэагавання на надзвычайныя сітуацыі МНС пад кіраўніцтвам намесніка Прэм'ер-міністра Рэспублікі Беларусь Анатоля Сівака адбылося пасяджэнне камісіі па надзвычайных сітуацыях пры Савеце Міністраў. У пасяджэнні прынялі ўдзел Міністр па надзвычайных сітуацыях Вадзім Сіняўскі, начальнік Белгідрамета Аляксандр Канавальчык, кіраўнікі дзяржаўных органаў кіравання, абласных і Мінскага гарадскога выканкамаў. Галоўнай тэмай працы Камісіі па надзвычайных сітуацыях стала падрыхтоўка сіл і сродкаў ДСНС да пажаранебяспечнага перыяду ў 2021 годзе. Анатоль Сівак акцэнтаваў увагу на тым, што першараднай задачай на сённяшні дзень з'яўляецца арганізацыя аператыўнага рэагавання на ўзнікненне пажараў у экасістэмах. Першы намеснік Міністра па надзвычайных сітуацыях Аляксандр Худалееў адзначыў, што ў апошнія тры гады назіраецца рост колькасці пажараў у экасістэмах. 87% ад агульнай колькасці – гэта загаранне травы і кустоў. У бягучым годзе пажаранебяспечны сезон пачаўся ў першай дэкадзе сакавіка. Найбольшая колькасць пажараў у экасістэмах ліквідавана падраздзяленнямі МНС на тэрыторыі Брэсцкай і Мінскай абласцей. Ён заклікаў кіраўнікоў усіх узроўняў прыняць вычарпальныя меры да кіраўнікоў аб'ектаў, якія дапускаюць несанкцыянаваныя звалкі і выпальванне леташняй расліннасці на корані. Фота ўзята з сайта МНС Акрамя таго, Камісія разгледзела рэалізацыю Нацыянальнай стратэгіі па зніжэнню рызыкі ўзнікнення надзвычайных сітуацый у Рэспубліцы Беларусь на 2019-2030 гады. Анатоль Сівак пазначыў, што стратэгія - новы і доўгатэрміновы дакумент, накіраваны на павышэнне ўзроўню бяспекі жыццядзейнасці грамадзян з акцэнтам на папярэджанне НС. Інфармацыя падрыхтавана па матэрыялах сайта МНС Беларусі  

9 красавіка 2021 года працоўны дэсант Белгідрамета на чале са старшынёй першаснай прафсаюзнай арганізацыі Наталляй Аляхновіч прынялі актыўны ўдзел у маштабнай акцыі, якая праводзіцца ў рамках экалагічнага руху «Разам за чыстую і зялёную краіну». Сумесна з прафсаюзным актывам г.Мінска і Першамайскага раёна быў праведзены першы этап акцыі па добраўпарадкаванні тэрыторыі, прызначанай пад маштабную высадку кустоў. Усяго запланавана высадзіць 10 тысяч кустоў жоўтага і чырвонага пузыраплодніка і ружы маршчыністай. Праца была не з лёгкіх - удзельнікі акцыі здымалі дзёран і добраўпарадкоўвалі абраны ўчастак на тэрыторыі, прылеглай да знешняй кальцавой дарогі насупраць Парку высокіх тэхналогій (вул. Купрэвіча,1) з падтрымкай вопытных настаўнікаў з КУП «Зелянбуд Першамайскага раёна г.Мінска» атрымалася хутка і якасна справіцца з пастаўленай задачай. Другі этап акцыі па добраўпарадкаванні, а менавіта высадка кустоў, адбудзецца ў канцы красавіка. Белгідрамет заўсёды падтрымлівае і ўдзельнічае ў акцыях экалагічнай накіраванасці, каб родны горад і любімы Першамайскі раён станавіліся ўсё больш прыгожымі, чыстымі і зелянейшымі.

На прытоку Сожа рацэ Проня ў в.Ляцягі ўзровень вады перавысіў небяспечную высокую адзнаку, у раёне гідралагічнага пункта назіранняў затапленняў не назіраецца.    

На рацэ Нёман у г.Гродна ўзровень вады дасягнуў адзнакі, пры якой узнікаюць цяжкасці ў працы рачнога транспарту.

Штогод 2 красавіка адзначаецца Дзень яднання народаў Беларусі і Расіі. Гэта знамянальнае свята ўвасабляе імкненне брацкіх народаў да інтэграцыі, захаванню і ўмацаванню духоўнага адзінства. Менавіта ў гэты дзень у 1996 годзе прэзідэнты Расіі і Беларусі падпісалі ў Маскве Дагавор «Аб стварэнні Супольнасці Расіі і Беларусі». За 25 гадоў існавання саюзны праект па-ранейшаму застаецца актуальным для абедзвюх краін: заключаны дзясяткі пагадненняў, перамовы праходзяць рэгулярна на самым высокім узроўні. Грамадзяне Беларусі і Расіі маюць роўныя правы. Краіны разам праводзяць абаронную палітыку, узгадняюць узаемадзеянне на знешнепалітычнай арэне, рэалізуюць буйныя эканамічныя, навуковыя і гуманітарныя праекты. Нягледзячы на складаную эпідэміялагічную сітуацыю ў свеце, 2 красавіка 2021 года ў Мінску і Маскве ў камбінаваным анлайн і афлайн фарматах прайшоў урачысты сход "Саюзная дзяржава: адкрываючы новыя магчымасці". У ходзе сходу былі праведзены тэматычныя экспертныя абмеркаванні актуальных пытанняў інтэграцыі Беларусі і Расіі па наступных напрамках: «Адзіная прававая прастора, абарона і бяспека-фундамент Саюзнай дзяржавы», «Эканамічны патэнцыял Саюзнай дзяржавы: стан і шляхі развіцця», «Сацыяльныя праекты і моладзь як рэсурс інавацыйнага развіцця Саюзнай дзяржавы». У рабоце дадзенага мерапрыемства прыняў удзел начальнік дзяржаўнай установы «Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя» Аляксандр Валер'евіч Канавальчык.  

  Сярэдняя тэмпература паветра па Беларусі ў сакавіку склала +1,1°С, што вышэй за кліматычную норму на 0,9°С.  Станоўчая анамалія тэмпературы паветра распаўсюдзілася па ўсей тэрыторыі, дасягнуўшы найбольшых значэнняў у Віцебскай вобласці (у сярэднім па вобласці 1,3°С), а найменшых – у Гомельскай вобласці (у сярэднім па вобласці 0,6°С).  У сярэднім па Беларусі за сакавік выпала 26,7 мм ападкаў, што склала 68% кліматычнай нормы. Па ўсёй тэрыторыі краіны адзначаўся дэфіцыт увільгатнення. Найменшая колькасць ападкаў выпала на тэрыторыі Брэсцкай вобласці (53% нормы), найбольшая - на тэрыторыі Віцебскай вобласці (79% нормы).  У сакавіку характар надвор'я спрыяў павольнаму раставанню лёду на водных аб'ектах краіны і паступоваму іх ачышчэнню ад ледзяных утварэнняў. Да канца месяца толькі на Заходняй Дзвіне ў г.п.Сураж захоўвалася няпоўная ледзяное покрыва, а на прытоку Прыпяці рацэ Пціч у в.Дараганава назіраліся забярэгі.  У сакавіку на рэках краіны паўсюдна адбываўся рост узроўняў вады вясновай паводкі. На асобных участках рэк басейнаў Нёмана, Віліі, Заходняга Буга, Дняпра, Бярэзіны, Сожа і Прыпяці ўзроўні вады перавышалі адзнакі выхаду вады на пойму.  На прытоку Сожа рацэ Проня ў в.Ляцягі ўзровень вады перавышаў небяспечную высокую адзнаку, а на Прыпяці ў в.Чэрнічы і г.Петрыкаў, а таксама на яе прытоку рацэ Случ у в.Ленін узроўні вады былі блізкія да небяспечных высокіх адзнак.  Да канца месяца, у сувязі з адмоўнымі начнымі тэмпературамі паветра, на асобных участках рэк назіраўся невялікі спад узроўняў вады і роўны іх ход, у выніку чаго на прытоку Сожа рацэ Проня ў в.Ляцягі ўзровень вады апусціўся ніжэй небяспечнай высокай адзнакі.  У сакавіку воднасць Сожа і Прыпяці была блізкая да звычайнай для гэтага часу года, менш за норму на 10-40% апынулася воднасць Нёмана і Віліі, а больш за норму на 20-40% была воднасць Дняпра, Бярэзіны і Заходняй Дзвіны ў раёне г.Полацк.  

У красавіку тэмпература паветра інтэнсіўна павышаецца ад першай дэкады да трэцяй і месяц характарызуецца інтэнсіўным прытокам цяпла, поўным знікненнем снежнага покрыва і выкрыццём рэк. Сярэдняя месячная тэмпература паветра (кліматычная норма) у параўнанні з сакавіком павышаецца на 7-8°С і складае ў сярэднім па краіне +7,3°С, змяняючыся ад +6,1°С у паўночна-заходняй частцы рэспублікі да +8,7°С на паўднёвым захадзе краіны. У асобныя гады яна можа прыкметна адрознівацца ад сярэдняй шматгадовай тэмпературы. Цяплей, чым звычайна на 2-3ºС было ў 1950, 1999, 2001, 2018 гадах. Самым цёплым за пасляваенны перыяд выдаўся красавік 2000 года, калі сярэднямесячная тэмпература паветра па рэспубліцы дасягнула +10,9°С, перавысіўшы кліматычную норму на 3,6 ºС. Халадней, чым звычайна на 3-4°С было ў красавіку 1954, 1956, 1958, 1965, 1981, 1987 і 1997 гадоў найбольш халодным апынуўся красавік 1955 года з сярэднямесячнай тэмпературай +2,5°С, што на 4,8°С ніжэй за кліматычную норму. Абсалютны тэмпературны мінімум, адзначаны на метэастанцыі Езярышча ноччу 5 красавіка 1956 года, склаў -20,8°С. Абсалютны максімум тэмпературы паветра (+31°С) быў зафіксаваны днём 29 красавіка на метэастанцыі Лельчыцы ў 2012 года. У першай дэкадзе красавіка, як правіла, ажыццяўляецца пераход сярэдняй сутачнай тэмпературы паветра праз +5°С (пачатак вегетацыйнага перыяду), а ў трэцяй дэкадзе ў многіх раёнах краіны - праз +10°С (пачатак перыяду актыўнай вегетацыі). У апошняй дэкадзе месяца на поўдні рэспублікі часцей за ўсё спыняюцца замаразкі ў паветры. На працягу месяца ў сярэднім бывае ад 10 да 16 дзён з ападкамі. У красавіку звычайна выпадае ад 33 мм да 46 мм ападкаў, у сярэднім па рэспубліцы 38 мм (кліматычная норма). Колькасць ападкаў можа вагацца ад 1-10 мм у засушлівыя месяцы да 76-168 мм у дажджлівыя месяцы. У 2009 годзе на метэастанцыях Брагін, Кастрычнік і Мар'іна Горка ападкаў не было зусім. Устойлівы снежны полаг у красавіку, як правіла, адсутнічае. Аднак у асобныя гады яго разбурэнне можа адбывацца і ў красавіку. Самая позняя дата разбурэння ўстойлівага снежнага покрыва зарэгістравана на метэастанцыі Лынтупы 30 красавіка 1955 года, у Мінску – 17 красавіка 1958 года. Паўтаральнасць туманаў у красавіку складае ад 1 да 3 дзён, павялічваючыся ў асобныя гады да 7-14. У красавіку ў сярэднім бывае 1-2 дня з навальніцамі, часам іх колькасць дасягае 5-7 дзён. Сярэдняя месячная тэмпература паветра ў красавіку 2021 года чакаецца на 1°С вышэй за кліматычную норму (кліматычная норма +6 + 9°С). Месячная колькасць ападкаў у красавіку 2021 года мяркуецца ў межах сярэдніх шматгадовых значэнняў (кліматычная норма 33-46 мм). Заўвага: прагнозы надвор'я на месяц распрацоўваюцца з выкарыстаннем статыстычных метадаў, носяць імавернасны характар і ўдакладняюцца прагнозамі надвор'я на тыдзень, на 2-3 сутак і на суткі.