Нацыянальны Герб Рэспублiкi Беларусь Міністэрства прыродных рэсурсаў і аховы навакольнага асяроддзя Рэспублікі Беларусь Дзяржаўная ўстанова "Рэспубліканскі цэнтр па гідраметэаралогіі, кантролю радыеактыўнага забруджвання і маніторынгу навакольнага асяроддзя" БЕЛГIДРAМЕТ
Галоўная / Стужка навін

Стужка навін

12.09.2019
Радыяцыйная абстаноўка на тэрыторыі Рэспублікі Беларусь на 12 верасня 2019 года
У сувязі з інфармацыяй, якая паступіла 12 верасня 2019 года ад МНС Рэспублікі Беларусь, пра пажар на тэрыторыі Палескага радыяцыйна-экалагічнага запаведніка ў Хойніцкім раёне Гомельскай вобласці Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя паведамляе.  Паводле інфармацыі МНС Рэспублікі Беларусь на 17:00 12 верасня 2019 года плошча пажару складае 50 га. Вядуцца работы па ліквідацыі пажару.  Паводле звестак стацыянарных пунктаў назіранняў радыяцыйнага маніторынгу атмасфернага паветра і пунктаў вымярэння аўтаматызаванай сістэмы кантролю радыяцыйнай абстаноўкі на 18:00 12 верасня 2019 года радыяцыйная абстаноўка на тэрыторыі Гомельскай вобласці, як і ў цэлым па краіне, застаецца стабільнай, перавышэнняў над ўсталяванымі шматгадовымі значэннямі не зафіксавана. Радыяцыйны маніторынг на тэрыторыях, прылеглых да агменю ўзгарання, праводзіцца ва ўзмоцненым рэжыме.   
12.09.2019
70-е пасяджэнне сумеснай калегіі Камітэта Саюзнай дзяржавы па гідраметэаралогіі і маніторынгу забруджвання прыроднага асяроддзя
У г.Нальчык (Расійская Федэрацыя) у перыяд з 12 па 14 верасня 2019 года на базе Федэральнай дзяржаўнай бюджэтнай установы «Высакагорны геафізічны інстытут» праходзіць 70-е пасяджэнне сумеснай калегіі Камітэта Саюзнай дзяржавы па гідраметэаралогіі і маніторынгу забруджвання прыроднага асяроддзя. На парадку дня пасяджэння разгляд шырокага кола пытанняў па ўзаемадзеянні нацыянальных гідраметэаралагічных службаў Рэспублікі Беларусь і Расійскай Федэрацыі, у тым ліку пытанні: «Аб ходзе рэалізацыі праграмы Саюзнай дзяржавы «Развіццё сістэмы гідраметэаралагічнай бяспекі Саюзнай дзяржавы» на 2017-2021 гады ў першым паўгоддзі 2019 года, « Аб аўтаматызацыі і далейшых перспектывах развіцця метэаралагічнай сеткі назірання Рэспубліцы Беларусь і Расійскай Федэрацыі», «Аб развіцці нарматыўна-прававой базы Рэспублікі Беларусь у частцы правядзення маніторынгу навакольнага асяроддзя ў раёне функцыянавання атамных электрастанцый на аснове вопыту Расійскай Федэрацыі», «Аб разглядзе новай рэдакцыі «Парадку ўзаемнага інфармавання ў выпадку пагрозы і/або ўзнікнення надзвычайнай сітуацыі радыяцыйнага характару ў сістэме Камітэта Саюзнай дзяржавы па гідраметэаралогіі і маніторынгу забруджвання прыроднага асяроддзя». Зыходзячы з традыцый правядзення пасяджэнняў сумеснай калегіі ў мерапрыемстве прымаюць удзел прадстаўнікі Расгідрамета, Белгідрамета, Пастаяннага камітэта Саюзнай дзяржавы, мясцовай адміністрацыі. Таксама на пасяджэнне запрошаны прадстаўнікі сродкаў масавай інфармацыі. Расійскую дэлегацыю ўзначальвае начальнік упраўлення геафізічнага маніторынгу, актыўных уздзеянняў і дзяржаўнага нагляду Расгідрамета Тасенка Сяргей Віктаравіч. Беларуская дэлегацыя прымае ўдзел у наступным складзе: Лабазнаў Раман Юр'евіч, начальнік Белгідрамета, намеснік старшыні сумеснай калегіі; Кузьміч Святлана Андрэеўна, намеснік начальніка Белгідрамета, член сумеснай калегіі; Беганскі Аляксандр Віктаравіч, начальнік службы метэаралагічных прагнозаў Белгідрамета; Карабчук Андрэй Рыгоравіч, намеснік начальніка службы - начальнік аддзела міжнароднага супрацоўніцтва Белгідрамета, сакратар сумеснай калегі.
12.09.2019
Пытанні аховы і выкарыстання трансгранічных вод Беларусі і Украіны абмеркавалі на сустрэчы ў Пінску
У Пінску адбылася сустрэча ўпаўнаважаных урадаў Беларусі і Украіны па пытаннях двухбаковага супрацоўніцтва ў сферы выкарыстання і аховы трансгранічных вод.  З 2009 года, як на тэрыторыі Беларусі, так і Украіны, праходзяць штогадовыя сустрэчы і пасяджэнні, на якіх вырашаюцца бягучыя пытанні, звязаныя з трансгранічнымі вадацёкамі, падводзяцца вынікі года, ставяцца задачы на новы. У рамках пагаднення працуюць чатыры групы-па кантролі якасці вод, па эксплуатацыі Днепра-Бугскай сістэмы, па эксплуатацыі меліярацыйнай сістэмы і па метэаралогіі. Як адзначыла на пасяджэнні ў Пінску Алена Багадзяж, начальнік службы экалагічнай інфармацыі ДУ «Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя», ужо надышоў той ключавы момант, калі вобласць супрацоўніцтва неабходна пашыраць. Раней паміж краінамі дзейнічаў тэхнічны пратакол, які распаўсюджваўся толькі на павярхоўныя воды і ахопліваў толькі іх гідрахімічныя паказчыкі і радыёнукліды. Але за гэты год была праведзена вельмі вялікая праца. Па словах Вольгі Лысюк, дырэктара Дэпартамента воднага менеджменту Дзяржаўнага агенцтва водных рэсурсаў Украіны, цяпер істотна будзе пашырана сфера паўнамоцтваў у маніторынгу якасці вод, у тым ліку і падземных, іх гідрабіялагічных і гідрамарфалагічных паказчыкаў.  У цэлым стан трансгранічных вод паміж Беларуссю і Украінай удзельнікі рабочых груп сёння ацэньваюць як нядрэнны. Звязана гэта ў тым ліку і з тым, што на тэрыторыях абедзвюх краін няма значных прамысловых аб'ектаў, у асноўным на іх займаюцца сельскай гаспадаркай. Упаўнаважаныя падпісалі новы пратакол і запланавалі сустрэчы на 2020 год, якія пройдуць ва Украіне. Падводзячы вынікі Андрэй Хмель, намеснік Мністра прыродных рэсурсаў і аховы навакольнага асяроддзя Беларусі, адзначыў, што вынікам сумеснай працы з'яўляецца канстатацыя добрай, непагаршаюшайся якасці водных рэсурсаў. Таксама важна, што іх дастаткова для ажыццяўлення гаспадарчай дзейнасці на тэрыторыях абедзвюх краін.   Па матэрыялах сайта:  varjag.net
06.09.2019
Аб правядзенні Адзінага дня Бяспекі
У рамках акцыі «Адзіны дзень Бяспекі» , якая праводзіцца ў краіне з 1 па 10 верасня 2019 года , у мэтах максімальнага зніжэння гібелі людзей ад надзвычайных сітуацый і для навучання работнікаў дзеянням ва ўмовах надзвычайных сітуацый, аварый, аказанні медыцынскай дапамогі, прадухіленні дарожна-транспартных здарэнняў – у дзяржаўнай установе «Рэспубліканскі цэнтр па гідраметэаралогіі, кантролі радыеактыўнага забруджвання і маніторынгу навакольнага асяроддзя» (Белгідрамет) праведзены наступныя мерапрыемствы: інфармацыя аб правядзенні Адзінага дня Бяспекі ў Белгідрамеце размешчана на інтэрнэт-рэсурсах; на стэндах у Белгідрамеце размешчана наглядна-выяўленчая прадукцыя аб бяспецы жыццядзейнасці; праведзена трэніроўка па эвакуацыі работнікаў Белгідрамета з адміністрацыйнага будынка з адпрацоўкай дзеянняў у выпадку выяўлення пажару з задзейнічаннем сістэм пажарнай сігналізацыі па абвестцы людзей аб пажары і кіраванні эвакуацыяй, выкарыстанні сродкаў індывідуальнай абароны; праведзены інструктыўныя заняткі з прыцягненнем супрацоўнікаў ДАІ і арганізацыі аховы здароўя.
03.09.2019
ІНФАРМАЦЫЯ аб гідраметэаралагічнай абстаноўцы ў басейнах рэк Рэспублікі Беларусь, якая склалася ў жніўні 2019 года
Сярэдняя па Беларусі тэмпература паветра жніўня 2019 года склала +17,7°С, што вышэй за кліматычную норму на 0,4°С. Тэмпература паветра павышалася да +30°С і вышэй. У Брагіне 13 жніўня зарэгістраваны абсалютны максімум тэмпературы паветра (+33,3°С). У самыя халодныя ночы жніўня тэмпература паветра паніжалася да +10°С і ніжэй. Абсалютны мінімум тэмпературы паветра (+2,9°С) зарэгістраваны 5 жніўня ў Брагіне. За месяц у сярэднім па краіне выпала 77 мм ападкаў, што склала 115% кліматычнай нормы. На працягу месяца ападкі выпадалі вельмі нераўнамерна. У першай дэкадзе жніўня колькасць выпаўшых ападкаў была блізкай да кліматычнай нормы (106%). Самай вільготнай апынулася другая дэкада жніўня, калі выпала больш 2-х норм ападкаў (214%). Самай сухой выдалася трэцяя дэкада месяца з колькасцю ападкаў 5,9 мм (27% кліматычнай нормы). Дажджы насілі ў асноўным ліўневы характар, суправаджаліся навальніцамі і ўзмацненнем ветру, месцамі дасягалі крытэрыю небяспечнай з'явы. Максімальная сутачная колькасць ападкаў была зарэгістравана 13 жніўня на метэастанцыі Шчучын (76 мм).  У першай дэкадзе жніўня на рэках краіны пераважаў спад узроўняў вады, у сувязі з чым на Заходняй Дзвіне ў г.Віцебск узровень вады апусціўся ніжэй за адзнаку лімітуючай суднаходства. У другой дэкадзе на рэках назіраўся ў асноўным рост узроўняў вады, абумоўлены выпадзеннем значнай колькасці ападкаў. У выніку чаго на Заходняй Дзвіне ў г.Віцебск і Бярэзіне ў г.Светлагорск палепшыліся ўмовы для працы рачнога транспарту. У трэцяй дэкадзе месяца ва ўзроўні рэк адзначаліся невялікія ваганні ўзроўняў вады. Неспрыяльныя ўмовы для працы рачнога транспарту адзначаліся на Нёмане ў г.Гродна, Дняпры ў г.Магілёў, г.Жлобін, г.Рэчыца і г.Лоеў, Бярэзіне ў г.Бабруйск, Сожы ў г.Крычаў, г.Слаўгарад і г.Гомель. На прытоку Прыпяці рацэ Ясельда ў г.Бяроза мінімальны ўзровень вады апусціўся ніжэй шматгадовага мінімуму за жнівень. Да канца месяца воднасць большасці рэк была блізка да нормы і некалькі ніжэй яе, толькі воднасць Прыпяці, Заходняй Дзвіны вышэй г.Полацк і Віліі ніжэй в.Сцешыцы апынулася значна менш звычайнай для гэтага часу года. Сярэднямесячная тэмпература вады ў рэках і вадаёмах склала +15..+22°С, што блізка да звычайнай для гэтага часу года.  
02.09.2019
Кароткая кліматычная характарыстыка і прагноз надвор’я па тэрыторыі Беларусі на верасень 2019 года (эксперымент)
  У верасні тэмпература паветра паніжаецца ад першай дэкады да трэцяй.  У 75% гадоў самай цёплай бывае першая дэкада, часам (прыкладна адзін раз у 5 гадоў) самай цёплай бывае другая дэкада і раз у 20 гадоў - трэцяя дэкада. Верасень - першы месяц восені, пачаткам якой лічыцца пераход сярэднясутачнай тэмпературы паветра праз +14°С у бок паніжэння (канец кліматычнага лета). У сярэднім гэты пераход ажыццяўляецца ў першай дэкадзе верасня. Сярэдняя месячная тэмпература паветра (кліматычная норма) вагаецца ад +11°С на паўночным усходзе да +13°С на паўднёвым захадзе рэспублікі і ў параўнанні са жніўнем паніжаецца на 5°С. У залежнасці ад характару развіцця атмасферных працэсаў у асобныя гады яна можа адхіляцца ад кліматычнай нормы. Цяплей, чым звычайна на 2-3°С быў верасень 1955, 1975, 1994, 2015, 2018 гг., халадней - на 2-3°С выдаўся верасень 1959, 1973, 1977, 1978, 1986, 1990, 1993, 1996 гадоў.  У дзённыя гадзіны паветра часцей за ўсё выграваецца да +15..+19°С, у самыя цёплыя дні ў палове гадоў – да +23..+27°С. Абсалютны максімум тэмпературы паветра ў верасні быў адзначаны 1 верасня 2015 года ў Жыткавічах і склаў +35,6°С. Начная тэмпература паветра звычайна бывае +6..+9°С. Абсалютны мінімум (-8,5°С) зафіксаваны ў ноч на 29 верасня 1996 года на метэастанцыі Палеская. У канцы верасня ў паўночна-ўсходніх раёнах рэспублікі ў паветры звычайна адзначаюцца першыя восеньскія замаразкі. Першыя замаразкі на паверхні глебы на большай частцы краіны ўжо могуць назірацца ў першай дэкадзе верасня, паўсюдна - у другой дэкадзе месяца. У выпадку вельмі цёплай восені замаразкаў у верасні не бывае. У сярэднім за месяц бывае 11-15 дзён з ападкамі і выпадае 49-77 мм ападкаў (кліматычная норма). Ад года да года месячная сума ападкаў значна вагаецца, і ў дажджлівыя месяцы сума ападкаў можа дасягаць 2-3 месячных норм і складаць 120-210 мм, у засушлівыя гады яна памяншаецца да 1-18 мм. Ападкі ў верасні выпадаюць у выглядзе дажджу, аднак пры моцных пахаладаннях у другой палове месяца магчыма і выпадзенне першага снегу, а ў канцы верасня 1972 года месцамі ў Віцебскай, Мінскай і Магілёўскай абласцях на непрацяглы час усталяваўся першы снежны полаг. У верасні ў сярэднім адзначаецца 3-8 дзён з туманам, максімальны лік дзён з туманам складае 13-17. Навальнічная дзейнасць у верасні слабее, і ў сярэднім адзначаецца толькі 1-2 дня з навальніцай. Сярэдняя месячная тэмпература паветра ў верасні 2019 года чакаецца на 1°С вышэй сярэдніх шматгадовых значэнняў (кліматычная норма +11..+13°С). Гэта значыць, верасень прагназуецца некалькі цяплей звычайнага. Месячная колькасць ападкаў у верасні 2019 года мяркуецца ў  межах кліматычнай нормы (кліматычная норма 49-77 мм).
30.08.2019
Агляд воднага рэжыму рэк у жніўні і прагнозная інфармацыя аб мінімальных узроўнях вады ў верасні
У першай і трэцяй дэкадах жніўня на рэках адзначаліся ваганні ўзроўняў вады, у другой дэкадзе пераважаў рост узроўняў вады, абумоўлены выпадзеннем значнай колькасці ападкаў. У выніку чаго на Заходняй Дзвіне ў г.Віцебск і Бярэзіне ў г.Светлагорск палепшыліся ўмовы для працы рачнога транспарту. На прытоку Бярэзіны рацэ Сушанка ў в.Суша і прытоку Прыпяці канале Бычок у в.Азяраны ўзроўні вады на непрацяглы час перавышалі адзнакі выхаду вады на пойму. Да канца жніўня воднасць большасці рэк была блізкая да нормы і некалькі менш яе, толькі воднасць Прыпяці, Заходняй Дзвіны вышэй г.Полацк і Віліі ніжэй в.Сцешыцы апынулася значна менш звычайнай для гэтага часу года.  На дату складання прагнозу на рэках назіраюцца ваганні ўзроўняў вады з тэндэнцыяй да паніжэння. На Нёмане ў г.Гродна, Дняпры ў г.Магілёў, г.Жлобін, г.Рэчыца і г.Лоеў, Бярэзіне ў г.Бабруйск, Сожы ў г.Крычаў, г.Слаўгарад і г.Гомель назіраюцца неспрыяльныя ўмовы для працы рачнога транспарту.  Мінімальныя ўзроўні вады ў верасні прагназуюцца ніжэй сярэдніх шматгадовых значэнняў для гэтага часу года. На Бярэзіне ў г.Светлагорск узровень вады апусціцца ніжэй адзнакі лімітуючай суднаходства.  
31.07.2019
Агляд воднага рэжыму рэк у ліпені і прагнозная інфармацыя аб мінімальных узроўнях вады ў жніўні
У ліпені на рэках басейнаў Заходняга Буга, Нёмана, Віліі і Бярэзіны адзначаліся невялікія ваганні ўзроўняў вады, на рэках басейна Прыпяці назіраўся ў асноўным іх спад, а на рэках басейнаў Заходняй Дзвіны, Дняпра і Сожа пераважаў рост узроўняў вады. На Заходняй Дзвіне ў г.Віцебск палепшыліся ўмовы для працы рачнога транспарту, тут узровень вады перавысіў адзнаку, якая лімітуе суднаходства. У ліпені воднасць большасці рэк апынулася на 30-50 % менш за норму, і толькі воднасць Прыпяці была блізкая да звычайнай для гэтага часу года. Мінімальныя значэнні ўзроўняў вады наблізіліся да шматгадовых мінімальных узроўняў вады за ліпень на прытоку Заходняй Дзвіны рацэ Дзісна, Нёмане ў в.Беліца і г.Гродна, яго прытоку рацэ Шчара, прытоках Заходняга Буга рэках Мухавец, Лясная і Нараў, Сожы ў г.Гомель, прытоках Прыпяці рэках Ясельда, Цна, Лань і Убарць. Мінімальны ўзровень вады дасягнуў гістарычнага мінімуму для гэтага месяца на Віліі ў в.Міхалішкі, а на прытоку Прыпяці рацэ Ясельда ў г.Бяроза ўзровень апусціўся ніжэй шматгадовага мінімальнага ўзроўню вады за ліпень. На дату складання прагнозу на рэках краіны назіраюцца ваганні ўзроўняў вады з сутачнай інтэнсіўнасцю 1-9 см. Неспрыяльныя ўмовы для працы рачнога транспарту захоўваюцца на Нёмане ў г.Гродна, Дняпры ў г.Магілёў, г.Жлобін, г.Рэчыца і г.Лоеў, Бярэзіне ў г.Бабруйск і г.Светлагорск, Сожы ў г.Крычаў, г.Слаўгарад і г.Гомель.  Мінімальныя ўзроўні вады ў жніўні прагназуюцца ніжэй сярэдніх шматгадовых значэнняў для гэтага часу года. 

Спецыялізаваныя сайты

Iнфармацыйныя iнтэрнэт-парталы