04.02.2025
Кліматычная характарыстыка студзеня 2024 года
Студзень лічыцца самым халодным месяцам года. Але у гэтым годзе сярэдняя месячная тэмпература студзеня была блізкая да сакавіцкай і склала +1,2°С, што вышэй за кліматычную норму на 5,3°С. Такі цёплы студзень за ўсю гісторыю метэаназіранняў адзначаецца ўпершыню. Да гэтага тэмпературны рэкорд належаў студзеню 2020 года з сярэдняй па краіне тэмпературай паветра +1,1°С.
Адхіленне сярэдняй тэмпературы паветра студзеня за перыяд 1991-2025 годы ад кліматычнай нормы (-4,1°С)
Станоўчая анамалія тэмпературы паветра распаўсюдзілася па ўсёй тэрыторыі Беларусі і знаходзілася ў межах ад 4,5 да 6,1°С.
У абласным разрэзе найбольшыя станоўчыя адхіленні тэмпературы паветра ад кліматычнай нормы адзначаны ў Віцебскай і Магілёўскай абласцях (у сярэднім па кожнай вобласці +5,8°С), найменшыя - у Брэсцкай вобласці (+4,7°С).
Адхіленне (°С) сярэдняй тэмпературы паветра студзеня 2025 года
ад кліматычнай нормы па тэрыторыі Беларусі
Усе тры дэкады месяца былі цёплымі. Самай цёплай была трэцяя дэкада са сярэднедэкаднай тэмпературай на 8,0°С вышэй за норму. Тэмпературы першай і другой дэкады перавышалі норму на 4,4 і 3,4°С адпаведна.
Сярэдняя тэмпература паветра і кліматычная норма
па дэкадах студзеня 2025 года па тэрыторыі Беларусі
Тэмпература паветра днём вагалася ад слабаадмоўных да слабададатных значэнняў, а ў самыя цёплыя дні, пераважна ў канцы месяца, перавышала 10-градусную адзнаку. Максімальная тэмпература паветра за месяц адзначана на станцыі Пінск 27 студзеня і склала 12,8°С.
Абноўлены абсалютны максімум тэмпературы паветра на станцыі Жлобін (+10,1°С).
У начны час большую частку месяца пераважалі адмоўныя тэмпературы паветра ад -2 да -7°С. Мінімальнае значэнне тэмпературы (-10,6°С) адзначана на станцыі Жыткавічы 6 студзеня. У асобныя ночы, у асноўным у канцы месяца, тэмпературы былі станоўчымі.
Адхіленне (%) месячнай сумы ападкаў за студзень 2025 года
ад кліматычнай нормы па тэрыторыі Беларусі
За месяц у сярэднім па рэспубліцы выпала 31 мм ападкаў, што склала 75 працэнтаў кліматычнай нормы. Уся тэрыторыя краіны, за выключэннем паўночных раёнаў, адчувала недахоп увільгатнення.
Па абласцях больш за ўсё ападкаў адзначана на тэрыторыі Віцебскай вобласці - у сярэднім 44 мм або 96 працэнтаў нормы. Менш за ўсё на тэрыторыі Гомельскай вобласці - 20 мм або 52% нормы.
Колькасць ападкаў за студзень 2025 года і кліматычная норма
па абласцях і па тэрыторыі Беларусі
На працягу месяца ападкі выпадалі нераўнамерна. У першай дэкадзе адзначалася залішняе ўвільгатненне (выпала 142% нормы). Другая і трэцяя дэкады былі сухімі (52 і 33% ад нормы адпаведна).
Колькасць ападкаў і кліматычная норма
па дэкадах студзеня 2025 года па тэрыторыі Беларусі
Ападкі выпадалі ў выглядзе дажджу, снегу і мокрага снегу. На працягу месяца снежнае покрыва на непрацяглы час устанаўлівалася, а затым з-за цёплага надвор'я разбуралася. На апошні дзень месяца па ўсёй тэрыторыі краіны снежнае покрыва адсутнічала.
На працягу месяца назіраліся туманы, галалёдныя з'явы. На станцыі Бабруйск 4-5 студзеня адзначалася мяцеліца. Па ўсёй тэрыторыі краіны адзначалася ўзмацненне хуткасці ветру парывамі да 15 м/с і больш. Максімальная хуткасць ветру адзначана на станцыі Навагрудак 2 студзеня (22 м/с).
Пры выкарыстанні інфармацыі спасылка на Белгідрамет абавязкова
Спецыялізаваныя сайты
Iнфармацыйныя iнтэрнэт-парталы
Iнтэрнэт-партал Прэзiдэнта Рэспублiкi Беларусь
Міністэрства прыродных рэсурсаў і аховы навакольнага асяроддзя Рэспублікі Беларусь
Бiяметрычныя дакументы Рэспублікі Беларусь
Нацыянальны прававы Інтэрнэт-партал Рэспублікі Беларусь
Нацыянальны цэнтр інтэлектуальнай уласнасці
Беларускі прафсаюз работнікаў лесу і прыродакарыстання
Мінская абласная арганізацыя Беларускага прафсаюза работнікаў лесу і прыродакарыстання
Афіцыйныя геральдычныя сімвалы Рэспублікі Беларусь