05.01.2021
Кліматычная характарыстыка снежня 2020 года
Тэмпература паветра за снежань 2020 года ў сярэднім па рэспубліцы склала -0,8°С, што вышэй за кліматычную норму на 2,5°С. Снежань з такой і больш высокай сярэдняй за месяц тэмпературай паветра, пачынаючы з 1945 года, адзначаецца ў сярэднім адзін раз у 5 гадоў, а за апошнія 20 гадоў – адзін раз у 2-3 гады.
Адхіленне сярэдняй тэмпературы паветра снежня
ад кліматычнай нормы па тэрыторыі Беларусі
Станоўчая анамалія тэмпературы паветра распаўсюдзілася па ўсёй тэрыторыі рэспублікі, дасягнуўшы найбольшых значэнняў у Віцебскай вобласці (у сярэднім па вобласці 2,8°С), а найменшых – у Гомельскай вобласці (у сярэднім па вобласці 2,2°С).
У дзённыя гадзіны тэмпература паветра пераважна знаходзілася ў межах -5..+5°С, у самыя цёплыя суткі павышаючыся да +7°С і вышэй. Максімальнага значэння (+9,4°С) тэмпература паветра дасягнула 29 снежня на станцыі Драгічын.
Начныя тэмпературы паветра былі пераважна адмоўнымі, а ў самыя халодныя ночы апускаліся да -5..-10°С і ніжэй. Мінімальнае значэнне тэмпературы паветра (-10,9°С) зарэгістравана на станцыях Езярышча і Касцюковічы 8 снежня.
Тэмпературны рэжым на працягу месяца быў не аднастайным. Сярэдняя тэмпература паветра першай дэкады была на -0,5°С ніжэй за норму, а тэмпература паветра другой і трэцяй дэкад перавышала норму на 3,1 і 4,6°С адпаведна. Устойлівы пераход сярэднясутачнай тэмпературы паветра праз 0°С у бок паніжэння па большай частцы тэрыторыі краіны ажыццявіўся ў апошніх чыслах лістапада - першай дэкадзе снежня на 2-3 тыдні пазней звычайных тэрмінаў, а па крайнім паўднёвым захадзе на апошні дзень месяца пераход не ажыццявіўся.
Сярэдняя тэмпература паветра і кліматычная норма
па дэкадах снежня 2020 года па тэрыторыі Беларусі
У цэлым за месяц па Беларусі выпала 34,9 мм ападкаў ці 78% снежаньскай кліматычнай нормы. Па тэрыторыі краіны ападкі распаўсюджваліся нераўнамерна. Больш за ўсё ападкаў адзначалася на тэрыторыі Віцебскай і Мінскай абласцей – 40,3 мм (82% кліматычнай нормы) і 39,1 мм (85% кліматычнай нормы). Найменшая колькасць ападкаў адзначалася на тэрыторыі Гродзенскай і Брэсцкай абласцей – 27,7 мм (58% кліматычнай нормы) і 28,8 мм (65% кліматычнай нормы) адпаведна.
Колькасць ападкаў за снежань 2020 года і кліматычная норма
па абласцях і па тэрыторыі Беларусі
Ападкі выпадалі ў выглядзе дажджу, снегу і мокрага снегу. На апошні дзень месяца на тэрыторыі Гродзенскай, Брэсцкай, Гомельскай і большай частцы Мінскай абласцей снежнае покрыва адсутнічала, а на астатняй тэрыторыі краіны вышыня снежнага покрыва знаходзілася ў межах ад 0,1 см да 9 см. У асобныя дні месяца назіраліся туманы і галалёдныя з'явы, якія дасягнулі 29 снежня на станцыі Орша крытэра небяспечнай з'явы – моцны галалёд з дыяметрам адклады пласта лёду 20 мм. На працягу месяца ў асобныя дні ўзмацняўся вецер парывамі да 15 м/с і вышэй, а максімальнае значэнне хуткасці ветру (20 м/с) зарэгістравана на станцыі Навагрудак 29 снежня.
Спецыялізаваныя сайты и сайты Філіялаў
