04.03.2020
Кліматычная характарыстыка зімовага сезону 2019-2020
Зімовы сезон 2019-2020 быў анамальна цёплым, сярэдняя па Беларусі тэмпература паветра склала +1,5°С, што вышэй за кліматычную норму на 5,5°С.
Такой цёплай зімы на тэрыторыі Беларусі за ўсю гісторыю метэаназіранняў не адзначалася ні разу. Папярэдні рэкорд належыў зімоваму сезону 1989-1990 з сярэдняй тэмпературай паветра -0,1°С. Станоўчая анамалія тэмпературы паветра адзначалася паўсюдна. Найбольшыя станоўчыя адхіленні тэмпературы паветра ад кліматычнай нормы адзначаны ў Віцебскай вобласці (у сярэднім па вобласці 6,1°С), найменшыя - у Брэсцкай вобласці - у сярэднім па вобласці 4,9°С.
Адхіленне сярэдняй тэмпературы паветра за зіму
ад кліматычнай нормы (-4,0°С) па Рэспубліцы Беларусь
Усе тры зімовых месяца былі вельмі цёплымі.
Снежань быў вельмі цёплым з сярэдняй месячнай тэмпературай паветра +1,9ºС, што вышэй за кліматычную норму на 5,2°С. У ранжыраваным шэрагу ад самага цёплага да самага халоднага снежань 2019 года заняў 2 месца пасля снежня 2006 года.
У студзені сярэдняя тэмпература паветра склала +1,1°С, што вышэй за кліматычную норму на 5,5°С. Такі цёплы студзень за ўсю гісторыю метэаназіранняў адзначаецца ўпершыню. Да гэтага тэмпературны рэкорд належыў студзеню 2007 года з сярэдняй тэмпературай +0,5°С.
Люты 2020 года быў вельмі цёплым з сярэдняй тэмпературай паветра +1,6°С, што вышэй за кліматычную норму на 5,9°С. Люты з такімі высокімі сярэднямесячнымі тэмпературамі паветра адзначаецца другі раз за пасляваенны перыяд. Самым цёплым з'яўляецца люты 1990 года з сярэдняй тэмпературай +2,6°С.
Сярэдняя тэмпература паветра і кліматычная норма
па месяцах зімы 2019-2020 па Рэспубліцы Беларусь
Максімальнага значэння (+12,8°С) за гэту зіму тэмпература паветра дасягнула 18 снежня на станцыі Драгічын. Мінімальнага - станцыя Езярышча 8 лютага і склала -11,1°С. Нягледзячы на высокія тэмпературы паветра абсалютныя максімумы тэмператур па месяцах не перавышаны.
На працягу зімовага сезону не ажыццявіўся ўстойлівы пераход сярэднясутачнай тэмпературы паветра праз 0°С у бок паніжэння, такім чынам, кліматычная зіма не наступіла, а тэмпературны рэжым на працягу трох месяцаў адпавядаў лістапада і сакавіка.
За зіму 2019-2020 у сярэднім па краіне выпала 125 мм ападкаў, што складае 104% кліматычнай нормы. Максімальная за зіму колькасць ападкаў выпала ў Віцебскай вобласці (158 мм або 118% кліматычнай нормы), менш за ўсё ападкаў (102 мм) адзначалася ў Брэсцкай вобласці-90% кліматычнай нормы за сезон.
Колькасць ападкаў за зіму 2019-2020 і кліматычная норма
па абласцях і па тэрыторыі Рэспублікі Беларусь
Снежань і люты характарызаваліся невялікім лішкам ападкаў, у студзені назіраўся іх недабор. У снежні выпала 48,1 мм ападкаў пры кліматычнай норме 45 мм, у студзені - 36,8 мм пры норме 40 мм, у лютым - 39,6 мм пры норме 35 мм.
Колькасць ападкаў і кліматычная норма
па месяцах зімы 2019-2020 па Рэспубліцы Беларусь
Ападкі выпадалі ў выглядзе дажджу, снегу і мокрага снегу. На працягу ўсяго зімовага сезону не адзначалася ўтварэнне ўстойлівага снежнага покрыва. Снег залягаў месцамі на непрацяглы час вышынёй 0,1-12,0 см. На апошні дзень зімы вышыня снегу па асобных пунктах назірання знаходзілася ў межах ад 0,5 да 4 см (метэастанцыя Езярышча), на тэрыторыі Брэсцкай і Гомельскай абласцей ён адсутнічаў зусім. Сезон 2019-2020 стаў самым маласнежным за ўсю гісторыю метэаназіранняў.
Гэтай зімой у асобныя суткі месцамі назіраліся туманы, галалёдна-шэраневыя з'явы, на дарогах - галалёдзіца. У асобныя суткі адзначалася ўзмацненне ветру да 15 м /с і вышэй. Максімальная хуткасць ветру (25 м /с), якая дасягнула крытэра небяспечнай з'явы, зарэгістравана ў Ашмянах 23 лютага.
У сувязі з анамальна цёплым надвор'ем гэтай зімой неаднаразова назіраліся навальніцы, якія лічацца вельмі рэдкай зімовай з'явай – у сярэднім па краіне ў зімовыя месяцы яны адзначаюцца раз у 15-20 гадоў. У студзені навальніцы адзначаліся ў Мінску і Магілёве (22 студзеня). Апошнім разам у студзені навальніца была зарэгістравана ў Мінску ў 1958 годзе, у Магілёве - у 1983 годзе. У лютым месцамі па краіне таксама неаднаразова адзначаліся навальніцы. Так, напрыклад, 18 лютага гэтая з'ява адзначалася ў Мінску і Наваградку. Апошнім разам у лютым навальніца была зарэгістравана ў Мінску ў 2008 годзе, у Наваградку - у 2017 годзе.
