Агляд аграметэаралагічнай сітуацыі на 19 чэрвеня 2018 года

На большай частцы тэрыторыі Беларусі ў яравых збожжавых культур назіраецца каласаванне, у пшаніцы ў паўднёвай палове краіны - красаванне, у ячменю на крайнім паўднёвым захадзе пачаўся наліў збожжа. Толькі на позніх пасевах у асобных раёнах працягваецца рост сцябла. У азімых збожжавых культур ідзе фарміраванне зярняўкі, у многіх раёнах паўднёвай частцы і на захадзе рэспублікі адзначаны наліў збожжа - наступіла малочная спеласць. У тэмпах развіцця збожжавых культур захоўваецца апярэджанне леташніх тэрмінаў.
Пасля дажджоў аграметэаралагічныя ўмовы для фарміравання ўраджаю збожжавых культур палепшыліся галоўным чынам ва ўсходніх і ў некаторых цэнтральных раёнах рэспублікі. На значных плошчах у паўднёвай і ў заходняй частцы краіны збожжавыя каласавыя па-ранейшаму адчуваюць недахоп глебавай вільгаці. Тут па дадзеных шэрагу метэастанцый нізкія запасы прадуктыўнай вільгаці захоўваюцца на працягу трох дэкадаў і больш - глебавая засуха дасягнула крытэра небяспечнай аграметэаралагічнай з'явы. Пашкоджанні збожжавых культур (пажаўценне, засыханне лістоў і сцеблаў) адзначылі шэраг метэастанцый ў Гомельскай, Гродзенскай, Брэсцкай і Мінскай абласцях.
На плошчах з нізкімі запасамі глебавай вільгаці складваюцца неспрыяльныя аграметэаралагічныя ўмовы для фарміравання і наліву коласа. У канцы гэтага тыдня чаканыя дажджы ў многіх раёнах рэспублікі павінны папоўніць ўтрыманне вільгаці ў глебе і палепшыць забяспечанасць вільгаццю сельскагаспадарчыя культуры.