Вядучым даследчым і навуковым цэнтрам краіны з'яўляецца Нацыянальная акадэмія навук Беларусі, заснаваная ў 1928 годзе. Яна аб'ядноўвае высокакваліфікаваных вучоных розных спецыяльнасцей і дзясяткі навукова-даследчых, навукова-вытворчых, канструктарскіх і ўкараняльніцкіх арганізацый. Сёння ў нашай краіне навуковымі даследаваннямі займаюцца больш як 25 тысяч спецыялістаў. Вынікі працы беларускіх навукоўцаў адказваюць высокім сусветным патрабаванням, актыўна прымяняюцца ва ўсіх галінах народнай гаспадаркі і сацыяльнай сферы краіны, уносяць значны ўклад у вырашэнне задач інавацыйнага развіцця дзяржавы.

У 2022 годзе гэтае прафесійнае свята беларускіх навукоўцаў і навуковых арганізацый выпадае на 30 студзеня. Адзначаюць гэты дзень і работнікі дзяржаўнай установы «Рэспубліканскі цэнтр па гідраметэаралогіі, кантролю радыеактыўнага забруджвання і маніторынгу навакольнага асяроддзя» (Белгідрамета). Так як Белгідрамет з'яўляецца вядучым у Рэспубліцы Беларусь цэнтрам - вытворцам аператыўнай фактычнай і прагнознай інфармацыі аб стане надвор'я, то ў аснове дзейнасці нашай арганізацыі ляжыць комплексны падыход да распрацоўкі і атрымання навуковай прадукцыі, у адпаведнасці са спецыфікай гідраметэаралагічнай дзейнасці.

Асноўнымі відамі навукова-практычнай дзейнасці Белгідрамета з'яўляюцца навуковыя даследаванні і распрацоўкі ў галіне прыродазнаўчых навук, іншая прафесійная, навуковая і тэхнічная дзейнасць. Прыярытэтнымі напрамкамі навуковых даследаванняў Белгідрамета з'яўляюцца:

• ацэнка змянення кліматычных і гідралагічных характарыстык на тэрыторыі Рэспублікі Беларусь ва ўмовах глабальнага змянення клімату;
• маніторынг і ацэнка радыяцыйна-экалагічнага стану навакольнага асяроддзя;
• навукова-метадычнае абгрунтаванне функцыянавання дзяржаўнай сеткі гідраметэаралагічных назіранняў у сувязі з укараненнем новых тэхналогій назіранняў;
• удасканаленне сістэмы апрацоўкі, захоўвання і кіравання кліматычнымі дадзенымі.

У 2020 годзе Белгідраметам пацверджаны статус навуковай арганізацыі. Атрымана пасведчанне аб акрэдытацыі навуковай арганізацыі ад 15.07.2020 № 221. Як навуковая арганізацыя Белгідрамет прымае ўдзел у міжнародных навуковых канферэнцыях і семінарах. Сумесна з іншымі навуковымі арганізацыямі выконваюцца навукова-даследчыя работы (вялікая іх частка ў сферы радыяцыйна-экалагічнага маніторынгу і ў галіне вывучэння змяненняў клімату). З больш падрабязнай інфармацыяй аб навуковай дзейнасці Белгідрамета можна азнаёміцца тут.

4 лютага 2022 года Белгідрамет прыме ўдзел у выставе да Дня беларускай навукі, якая адбудзецца ў Прэзідыуме Нацыянальнай акадэміі навук Беларусі. У рамках экспазіцыі арганізацый Міністэрства прыродных рэсурсаў і аховы навакольнага асяроддзя Рэспублікі Беларусь Белгідрамет прадставіць новыя распрацоўкі і дасягненні ў галіне гідраметэаралогіі, прадэманструе прымяненне іх на практыцы. Наведвальнікі змогуць задаць любое пытанне, якое зацікавіць іх пры аглядзе экспазіцыі, на якое адкажуць спецыялісты Белгідрамета.

Запрашаем наведаць стэнд Белгідрамета!